Ko Tonga ‘i he Lākanga Fakapolitikale Fo’ou – Ko hono ‘analaiso ‘oe ola ‘oe Fili Fale Alea ‘oe 2014

Na’e fakatoka ‘e he ngaahi liliu fakakonisitūtone mo faka politikale ne fakahoko kimu’a ‘i he fili Fale Alea ‘oe 2010 ‘a e vaa’ihala fo’ou ki he kakai ‘o Tongá ke nau fili ai ha pule’anga ‘oku tokolahi ange ai e kau fakafofonga ‘oe kakaí pea taliui foki ‘a e pule’angá ki he kakaí.

Koe fili Fale Alea hono ua hili ‘a e liliú na’e fakahoko ia ‘i he ‘aho 27 ‘o Novema 2014. Koe hā ‘a e felave’i ‘a e ngaahi liliu fakakonisitūtone moe fakapolitikalé moe ola ‘o e fili Fale Alea na’e fakahoko he 2014? ‘E lava nai ke toe fakalahi ‘a e liliú ke toe fakalahi ange ‘ae fakafofonga’i ‘e he pule’angá ‘a e kakaí?

Koe pepá ni ‘oku ne ‘analaiso ‘ae ola ‘oe fili Fale Alea ‘oe 2014 - ke faka’ilonga’i ‘a e ngaahi ‘elia ‘oku totonu ke fai ha vakai kiai ‘a e kau taki fakapolitikalé. ‘Oku mahu’inga ke ‘ilo’i ‘a e ngaahi ‘eliá ni koe’uhí ke hokohoko atu ai pe ‘a e tanumaki moe langa hake ‘oe temokalati kuo fokotu’u ‘i he makatuliki kuo fakatoka ‘ehe ngaahi liliu fakapolitikale kuo ‘osi fakahoko ‘i Tongá.